అంతర్మధనం

నీ లోతుల్లో ఏ మూలో
దాక్కున్న అంతర్ముఖం
పగలంతా నిద్రలో జోగుతూ
రాత్రుళ్ళు కత్తులు రువ్వుతుంది
ఎగిసిపడే ఆలోచనలలో
తడిసి ముద్దయ్యే నిన్ను 
నీవే కౌగిలించుకుని
భావ తీవ్రతలో
ఆర్థ్రమయ్యే మనసుకు
జోలపాట పాడే ప్రయత్నంలో
అంతర్ముఖంతో అంతర్మధనం చేస్తావు 

నువ్వు

నా బాధలో భాష్యంలో తోడు నువ్వు 
అలవోకగా కదలాడే అలజడి నీవు!!
నా ఒంటరితనపు చేయూత నువ్వు 
ఆశల వెల్లువలో ఊరట నీవు!!
నా ప్రతి కదలికకీ భాష నువ్వు 
ఆగ్రహం వచ్చిందంటే ఆనకట్టవు నీవు!!
నా తోడు నీడా అన్నీ నువ్వు
సమస్యలో పరిష్కారం కూడా నీవు!!
నా నిశిరాతిరి ప్యనం నువ్వు
మండుటెండలో మంచుకొండవు నీవు!!

ఊహ

ఏదో ఒకసారి గుర్తుకురావడం ఏమిటి?
మస్తిష్కంలోని ప్రతికణంలో నిక్షిప్తమైపోతే
ఏదో ఒక స్థితి పరిస్థితి
ఏదో ఒక సంఘటన ఒక అనుభూతి
అప్పుడప్పుడూ మేఘాలు కమ్మే 
మనసు ఆకాశం అయిపోయి
హృదయతంత్రులు వేదనతో నిండె
గుండె భారం అయిపోయి
అయినా ఏదో రాగం ఆలపిస్తున్నా
నువ్వు నేను ఒకటే అనుకున్న ఊహల్లో..